Povareti i.... povareti!
Che bel piaçer, che gusto a sfregolar
le man davanti al fogo là in tinelo,
quando la neve a pianpianin, bel belo
la ne vien zozo quieta a sbianchissar!
Vedendo quei fiocheti mi me par
che me torna da novo el cuor putelo,
e, come alora, un mato garanghelo
su l'anema me sento a desvegiar.
E vardo in çielo e in tera e 'n bel tocon
de legno meto ancora in t'el fogher....
quando colpìo da un forte sgrissolon,
sento un dolor che sùpara el piaçer
se penso, povareti, a tuti quei
che da le scarpe ghe vien fora i dei.
