Come le fogie
E penso: Ah se tornar podesse indrio
e aver da novo la mia prima età!
oh quante e quante robe l'èssar mio
vorave far! Oh quante novità
gavaria su mi za stabilìo,
cucar podendo el tempo ormai passà!
vorave d'ogni cosa far desio
se no la presentasse utilità:
Deventaria guerier, omo de scienza,
filosofo, poeta, artista e.... forse
un Musolin mai privo de risorse,
se no sentisse in mi, santa pazienza,
ste povare ilusion scampar da drento
come le fogie portae via dal vento.
