L'amnistia
Cossa mai, la sarà n'opara bona,
un trato de bon cuor, un sentimento
de nobiltà che aprova ogni persona;
ma çerte robe mi le ingioto a stento.
A un ladro, a un borsariol se ghe condona
'na parte del castigo, e in t'un momento
se vedemo da novo una corona
de malviventi atorno a usmar el vento.
Se dise che fassendo ste amnistie
a le canagie, ai ladri e birbi e spie,
se çerca de condurli a l'onestà.
Ma come mai voleu che de sta roba
traga profito un tal che ormai ga za
vinti condane e più sora la goba?
