Musicomania
L'aver nel proprio alogio, o signorina,
un pianoforte a coa o vertical,
la xe 'na roba tanto natural
se fin le serve ancuo lo ga in cusina.
L'averlo, po, e gratarlo tanto mal
com'ela fa de sera e de matina,
l'è 'na barbaria tal che gnanca Nina,
la serva mia, cometaria l'egual.
Ela xe senza recia, o vecia mia,
no la ga l'estro e gnanca el sentimento;
la me conosse el tempo.... quando piove
e no la sa un fiantin de robe nove.
Se fusse in ela cambiaria strumento
o da chi sa, sonar me lo faria.
