Un fio de una Republica nascente
Sta bella puta pensa de violar;
Un omo de un esterno conveniente,
Ma un cuor che de pezor no se pol dar:
El se ghe acosta, ma co tanta zente,
Che farave un Sanson ispiritar;
Ma furbo come ’l xe, pien de malizia,
El finze de tratarla in amicizia.
Cossa mo fà sta povera creatura,
Inteso sto imperioso zarlatan?
Da gnoca la ghe crede a tal mesura,
Che in bota del so cuor la ’l fà Sovran;
E sempre più sto dreto l’assecura,
Con modi che pareva da Cristian,
Che in gnente afato el la molestaria,
Ma che anzi più signora el la faria.
Intanto co un esercito infinito
El magna e’ l beve sempre a le so spale,
Finchè la bona fiola tuto ha frito,
Dandoghe infin l’arzento co le pale;
Ma st’Omo che xe stà sempre pulito,
Vedendo che la resta spogia in cale,
L’ha fato in bota l’ato de vertù
De farla d’altri per salvarse lu.
Co la s’ha visto tanto vilipesa,
La ghe dise a sto degno capital:
Oh questa pò no s’averà più intesa,
Che se concambia el ben co tanto mal.
Ma lu non se fa gnente de sorpresa,
E con la so franchezza natural
El se scusa disendoghe: Per dio!
Sto desegno, sorela, no xe mio.
