De opere classiche
Su vario sogeto
Go visto in catalogo
Segnae per dispeto.
Go visto miracoli
De raro talento,
Go visto filosofi
Cavarsela a stento.
Go leto poemi
De omeni doti
Tratar seriamente
Do cani e simioti,
A tuti è notissimo
Ch'el nostro Bufon
De bestie svariate
Ga dà più lezion
El storto d'Esopo
E tanti a lu drìo
Ga fato parlar
Perfin el conio.
Chi à dito del manzo
E chi del cavalo,
Chi assae gà parlà
Più del papagalo
E basta citarve
El Casti fra tanti
Che à fato un poema
Le bestie parlanti.
Insoma in sto secolo
E in queli passai
De bestie argomenti
Ghe n'è sta tratai..
Mai più come adesso
Se rende imortali,
Le bestie coi omeni
Se fa quasi eguali.
Difati se memora
In t'un monumento
La bestia co' l'omo
E l'omo è contento.
