CAMPO DE L'ARSENÀL
A mio Padre.
La xe stada la casa dei oto ani,
dai quatòrdese fin ai vintido,
dei ani più tremendi e più malsani,
4ma dove go imparà quelo che so.
I ani del Liceo, de la pleurite,
dei nervi scossi che me fava mal,
de vertigini in testa e forti fite,
8zo per la fondamenta a l'Arsenàl.
I ani che lezéva zorno e note
a casa, a scuola, in strada, in biblioteca,
de sere malinconiche e pianzòte,
12de le prime sconfite che ne seca.
I ani che coreva via filato
ai Zardini per ore a caminàr,
e a Padova doveva far el mato
16quela strazza de laurea per ciapàr.
