Una togna calada in sti canai
Sente che ’l pesce intorno a l'amo tresca
Tanto scherzando che, ala fin, se inesca:
Pesco ogni zorno e no m’incozzo mai.
Trago ogni di dai oci aqua de pianto
Nè su quel sasso mai vedo un incavo
E pur me afligo e me consumo tanto.
Cerco solievo e sempre più me agravo,
Bato una piera e l'azzalin xe infranto
Nè mai faliva de pietà recavo.
Daspò, Liseta, che da mi lontane
Xe andae le to bellezze uniche e rare
Come se avesse inversià la mare
Me vien suso ogni dì cento fumane.
Susto, me instizzo e tra speranze vane
Tristi ho i mii zorni e le mie note amare:
Me crepa el cuor, me vien le bisse vare,
Le tremariole ò insieme e le scalmane.
Torna Liseta a casa e da cordogio
Trame, cuor mio, deh torna a ravivarme
Che ’l vital mio pavero apena ho mogio!
Torna mamola si: che se a voltarme
Ti no me vien la vida e a darme l'ogio
Schiopa la bronza e son per destuarme.
