E quando po’ una barca, in tel passar,
la li slontana, dandoghe un spenton,
a pian, dopo un fiantin d’esitazion,
i se torna l'un l’altro aviçinar...
Perchè l’amor se giusto quela cossa
che voi che star lontani no se possa:
perchè l’amor, se gh’è un impasso, un riscio,
xe proprio alora ch’el deventa vis’ciò.
Quando che vien l’istà, quando el siroco
ne mete adosso tanta e tanta fiaca,
putei e grandi i fa el so bagno a maca
e i se rinfresca in acqua e i ghe sta un toco.
E no ve digo alora quanti ciassi,
e quanti salti e che zighi e che spassi!
Le marne sbragia, e i fioi fa le schenae,
e quei che passa ciapa le sgianzae!
Co passa un morto, a pian, a pian, a pian,
sora una barca nera a franze d’oro,
sento la zente che contenta in coro,
finchè la barca no la sia lontan.
Tralassa de zogar qualche putelo:
i omeni i sta là senza capelo:
una vecia se segna e un pescaor
pensa: L'è morto anca se el gera sior!
