— Dai, cori a tor de l’aqua per la mama
che ghe sbiansemo el viso, — Ah mama mia!
— Comare, andemo via che no ze gnente!
Cossa vorla che sia?!..
— No la spaventa, cazza, sti putei!
— Ciò mama: no go gnente, sastu qua!
Vardime ben: ze sta co sta sariesa
che me so un fià sporca.
Dio che missìada! Mi no ghe so meza!
La senta el cuor e i me sarvei, comare...
La sa cossa che ze?! Eh benedeta:
mare ze sempre mare.
— Qua ’ndemo sempre pezo, sa Nanei
e se la va cussì finimo in gnente:
da sta matina in qua... sessanta schei
co’ tuta quela racola de zente!
’Na volta almanco, ciò, se becolava
qualcosseta ogni tanto co i signori,
quando i moriva o co i se mandava,
ma 'desso, bonanote sonadori!
Co quela scusa dela bona usanza
a le Pentie i ghe lassa o a la Pietà
quei quatro lombardosi che ghe vanza
e per nu no ghe ze più carità.
