E come in zoventù a Costantinopoli
Ambasciator l'è stà dei Veneziani
Portando via la moda fra quei popoli
De pararghelo suso ai Musulmani
Ghe intimo d'aver l'ochio ai nomi in opoli
Che n'à tolto de man tanti cristiani
Sti afari xè per lù manco del gnente
Co l'uso fato de cercar l'oriente.
Un leterato gh'è de prima sfera 6
Che xè pien de bon gusto e de dotrina;
De la rica d'inzegni Grega tera
Risplende in lù la fiacola divina;
Fisseghe l'ochio pur su quela ciera
De zalognola tinta peregrina,
A muso vederè ch'el gà la marca
De chi d'erudizion se chiama un'arca.
E in vista de sti pregi distintissimi
Invernizai da certa cara unzion,
In libertà ve lasso, eminentissimi
De nominarlo o Borgia o Bessarion,
Se a la mona nù semo propensissimi
Se preferimo a un libro un culo bon
Per la gloria và ben del mio Papato
Che abiemo cardinal un leterato.
Finalmente al capelo xè aspirante
Un vechio che sui lavri porta el cuor 7
Un che xè sta fra tante guere e tante
De imensissime armae capo ispetor,
Che à manizzà milioni de contante
Senza farse la ponga da signor
Anzi insultando tanto la fortuna
Ch'el bate spesso (chi diria?) la luna.
Pagina:Poesie e satire di Pietro Buratti veneziano.pdf/120
Sta pagina la xe stà trascrita, ma la gà ancora da vegner rileta.