Sta pagina la xe stà trascrita, ma la gà ancora da vegner rileta.
Coi fioli da scopole
Vendui dai so pari
Serviva al postribolo
De scrochi da bari.
Co gera de vitime
Rechiamo inosenza
A quela zirandola
De piaghe semenza.
Co soto l'auspizio
De un mostro imoral
Marchiava lusuria
In caro trionfal.
Ma adesso che l'ordine
Xè nato tra nù
Che luse più libera
Nei cuor la virtù.
Che a note tardissima
No più da Florian
Del zogo se numera
I colpi de man.
Che là quei carnefici
Piantai su la maca
No mostra a le vìtime
Scoverta la vaca.
Che senza pericolo
De un ladro vicin
Pol l'omo pacifico
Pusar el martin.
Che più no formigola
I ebrei sui cafè
Che Cristo se calcola
Magior de Moisè.