Vù fè de tuto, in tuto ve intrighè,
Ipofilo in Arcadia sè chiamà,
Del Veneto Ateneo membro vù sè 7
E là ve lo sentì sempre tirà.
Voi dir che no ve par d'esser regazzo
Co in abito da membro e in fiuba d'oro
Dè man dei vostri elogi al scartafazzo
Che d'ordinario rompe a tuti el foro.
Da vù dipende el meter ne la storia
Dei omeni più ilustri chi ve piase,
E sublimar de Rubi la memoria 8
A dispeto del publico che tase,
Per un strazzo de anelo da Piovan 9
Che v'à lassà in legato el vostro mestro,
E che in deo vù portè per talisman
De sacra vena, o gesuitic'estro.
A la gloria de Milton che gà el calo 10
Vù ghe andè incontro con la lanza in resta
E coredè le buzere co un scialo
D'erudizion robada senza testa;
No capindo che i genj in prima sfera
No scimiota nissun, e che i cogioni
Ghe par de dir assae coi fà cagnera
Dei so anzoli armai dei so canoni.
Ma Milton se la gode, e ne l'eliso
Rilezendoghe a Omero un sfarzo degno
Se slonga Rubi per sentirlo, el viso
El ghe ziga, và in là testa de legno. 11
Impertinente vù più del mussato
Volè contarghe in rechia a tuti quanti,
O come i papatasi se beato
De becar senza strepiti i ziganti.
