D'inocenza belissima virtù
Ah che me vien deboto da fifar
Co penso che inghiotìa da Belzebù
Ti è andada proprio a farte buzerar!
E son pronto a scometer che dai più
Se crederà che vogia minchionar
Cantando la storieta de Tognon
Nel fior de la so età tanto cogion.
El bravo mio Turpin pretende e vol
Che in pase veramente patriarcal
Stasse co Marta, e co Bastian sto fiol
(Sinonimo perfeto de un Bocal)
In Caseta de pagia che dal sol
Scodeva un bel saludo matinal
E serviva in genaro da camin
A sto povero terno contadin.
Per parentesi musa mando al diavolo
Sta desinenza in tronco tropo stitica,
E con più libertà la rima intavolo
Parte per estro, e parte per politica,
Che in fondo za no me ne importa un cavolo
Se qualche caga dubi e ride e critica,
Fala con mì chi la vol far da oracolo
E meter in caena el mio vernacolo.
De Marta e de Bastian soto la cura
Sui disdot'ani deventà colosso
Gera proprio Tognon fio de natura,
Me spiego megio, aseno grando e grosso,
Testa da palamagio e cussì dura
Che in falo al bianco, el ghe diseva rosso,
Ma de pasta per altro tanto bona
Che i so compagni che diseva el Mona.
