Se te pesa mai le scale
Te sparagno la fadiga
Drento almanco de sta cale 2
Daghe un baso a la to amiga.
A ste care parolete
Me pareva zà che amor
Le so barbare saete
Me slanzasse in mezzo al cuor.
In contrasto col decoro
Per la zente che passava
Spesso el culo al mio tesoro
Per vergogna ghe voltava.
Ma più spesso da Poeta,
Co no gera tanta fraca
Imbocando la caleta
Ubidiva a la mia vaca.
Scusa cara se sto nome
Per la rima te refilo
L'ò imparà, mi no so come,
Da quel critico de Ancilo, 3
Che per massima invechiada
La parola buzzerona
Vol in Crusca registrada
Per sinonimo de dona.
Oh che gusto per mi gera
De vederte là in quel logo
Venir zoso farme ciera
Darme un baso tuta fogo.
Co la lengua drento in boca
Co le man sul mio zogatolo
Del furor de la to coca
Testimonio gera el gatolo.
Pagina:Poesie e satire di Pietro Buratti veneziano.pdf/46
Sta pagina la xe stà trascrita, ma la gà ancora da vegner rileta.