Che tuto el dì mandava roba in gheto;
Ma fa ancuo, fa doman un tal mistier,
Perdia! che se n'à acorto el bon cucheto;
E doparando a gradi un bravo legno,
El l'à messa a la fin sul bon contegno.
Saveu quanti ghe n'è de tale quali,
Che xe pitochi, e che no i sa perchè;
Che ga la testa simile ai cocali,
Che se fida de quanti, che ghe xe,
Che tardi se ne acorze dei so mali,
E tardi i va cigando; oh dio! oimè!
Ma rimedio no gh'è per el so mal,
Perchè più no se trova un fra Vidal.
Padre, ve servirò,
Ve lo prometo mi, no parlerò;
Solo me sia permesso..
Taso, gavè rason, perchè ò promesso.
Ma se anca taso mi,
Za che la mia desgrazia vol cussì.
Cossa mai vadagneu? conteme su,
Se tuti, e tuti parla ben de vu.
