Pagina:Poesie veronesi (Giovanni Ceriotto).djvu/92

Sta pagina la xe stà trascrita, ma la gà ancora da vegner rileta.
II.


     Casca l'ultima foia e se indormensa
le tirele1 i morari2 e tase i prà;
qualche oseleto l'è restado sensa
quel nio3 de foie che 'l s'avea comprà;

     casca falive4 come 'na semensa
de perle bianche che s'à desfilà;
tase la cesa e el campanil che 'l pensa
a quante Ave Marie che l'à sonà.

     E se par caso da lontan se move
'na campana che a pian la se desgiassa
come un cor che te parla e se comove,

     l'è un'orassion che se desmissia fora,
l'è par contarghe a qualchedun che passsa
che 'l batucel se la ricorda ancora.

  1. tirele: viti
  2. morari: gelsi
  3. nio: nido
  4. falive: piccole falde di neve
Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=Pagina:Poesie_veronesi_(Giovanni_Ceriotto).djvu/92&oldid=64019"