LA FELICITÀ
Dal nasser tuti à el cancaro che i magna,
Tuti à el so'propio umor da la so' sorte,
Chi teme, chi desidera la morte,
Chi ride del continuo e chi se lagna;
Chi brama dominar monte e campagna,
Chi seguita e chi fuge onori e Corte,
Chi cerca per vie drete e per vie storte
Che 'l so nome drio lu vivo romagna;
E fin che un no se cava un apetito
No l'à mai ben; e se 'l sel cava po'
El va col desiderio in infinito;
Gramo colù, se 'l mondo fusse so',
Se 'l sarà in l'ozio e in l'ingordisia fito.
Felici quei che un agio ghe fa pro!
