IN LODE DI MADONNA SANTINA
CANZONE ALLE MUSE
O vu, che stè là suso
In cima del Parnaso,
Conzème un poco el muso
Dè de l'aqua al mio vaso,
Dème dei versi,
Fème tanto favor
Che possa del mio amor
Cantar le parti bele
Sì che ghe n'abia invidia anca le Stele.
Vu fè le scorozzose,
E sì no respondè,
Perchè no se' vezzose
E bele, come xe
Questa Santina.
La è tuta fiama e fogo,
La brusa in ogni logo,
Ogni aspro cuor la impiaga
E de la morte mia l'è sempre vaga.
