L'AMANTE UNICA
Se s'acordasse in Ciel ciascuna Stela
De meter le so' forze ai nostri dì,
E meter tuto quel che le poi pì
Per formar una Venere novela,
No saria mai che me piasesse quela
Tanto co' è questa ch'ò depenta in mì;
Mai cercarla ciò che la fusse in sì,
So ben che in mì no la sarìa più bela;
No posso far sì lucido concetto,
Che apresso al Sol che luse al mio pensier
Ogn'altro no me para un feraleto;
No 'l posso far, e no vorìa poder;
Fia, no credè ch'altri che 'l vostro ogeto
Me daga maravegia nè piaser.
