LA FAME
Songio mì, Amor, quel servidor de dame?
Songio mì, Amor, quel che brusava tuto?
Songio quel mi per ti cussì riduto?
O songio un resanà che mor da fame?
Dove xe la to' forza e le to' fiame
Che m'aveva sti dì sì mal conduto?
Va, le fica in t'un pan, o in t'un persuto
Se ti vol che mi torna al to' reame.
Del resto fame usar tuti i to' trati,
Fa ch'abia mile, se no basta un sguardo,
Che mai levarò el cuor zo de sti piati.
Va pur, e meti in semola el to' dardo,
Che per adesso son co' ze quei gati
Che lassa el sorze per magnar el lardo.
