L'AMORE SENZA COMPENSO
Oh quante volte al dì son un lion!
Oh quante volte al dì son un agnel!
Quanto m'inalzo col pensier al Ciel!
E po me lasso andar zo a tombolon!
Oh quante volte niego la rason
E fazzo l'apetito mio fradel!
Quanto stago in amor poco in cervel!
Quando possio saver mai quel che son?
Oh quanto spesso bramo nè so che,
E quel co so che l'ò nol vorìa aver,
E co' ghe ne son privo ardo da sè!
Oh quanto un sguardo sforza el mio voler!
Quanto ò el cuor pien de miel e d'aloè,
E in quanto mal gh'è un poco de piacer!
