LA DICHIARAZIONE
Colona mia, per do' o tre volte sole
Che l'altra sera m'avè tolto su
Mi me son tanto inamorà de vu
Che vago tuto in agua de viole;
E per no starve a far tante parole,
Per no starve mo a dir, che un poco più
Son squasi morto al gran martel ch'ò abù,
Co' fa sti inamoraì che va in do' siole;
Se vù volè che sia vostro moroso,
Son aponto per vu, son tuto gagio.
Vu averè certo un zovene vistoso,
Un omo po', che quando vogio vagio,
Un zovene a la fine vertudioso,
E se vu nol credè, tiolème a tagio.
