PREGI DI BELLE DONNE
Ò dito, digo, dirò fin che viva
Che no ghe basta zoventù o grassezza
A voler far da seno una belezza
Che no gabia a gran pezzo chi l'ariva.
El caso è chiaro assai senza che 'l scriva,
Che per la principal ghe vol grandezza,
Che vol quel ochio ladro che ve spezza
El cuor, s'el fussè ben de piera viva.
Ghe vol certo profilo e lineamento
Ch'abia proporzion e nobiltà,
Con non so che che bulega per drento.
Vu me dirè: la grazia mo gh'è la?
La grazia è parte ben de gran momento,
Ma la xe grazia no la ze beltà;
No zureràve za
Che bona fusse anca questa sola
De far che me mentisse per la gola.
