L'INVITO
Fia mia, viseto belo, inzucherà,
Daspò ch'ò inteso che vegnì sta sera,
Son vegnù belo e son muà de ciera,
Che paro proprio un persego mondà.
Sia lode a Amor, daspò che 'l mio mezà,
La mia corte, el mio orto, e la letiera
Poderà dir da seno e da dovera:
Sì che 'l nostro paron xe fortunà.
Vegnì in bon'ora, caro el mio conforto,
E caso mo che me dessi l'impianto
Doman sentirè a dir: l'amigo è morto.
El desiderio che ò de vu xe tanto,
Che no vegnindo me faressi torto
E certo restarìa col cuor infranto;
Son de miel tuto quanto
Daspò che ò abù da niovo che vu, fia,
Ve degnarè vegnir in casa mia.
