PROTESTA DI VOLER BERE
Chi à visto un tal soldà farse chietin
E abandonar sto mondo traditor?
Cussì lasso anca mi l'arme e l'amor,
E me dedico tuto al Dio del vin.
Pianzo, gramo, i mii dì, pianzo anca 'l fin
Che m'ò proposto de vertù, de onor,
E se 'l bever pentio lava l'eror
Mi resto neto co' xe un armelin.
Mai più abandono el vin, massime el bon,
Mai più vani pensier m'intra in la mente,
Mai più m'infeta el cuore l'ambizion.
Mondo, i to beni xe da inganar la zente,
I è fati co' è vessighe de saon,
Che par sì bele e se resolve in gnente!
