Un Gobo fato a fondo de melon,
Più roan che no xe l'osso de Spagna,
Tuto difeti e tuto una magagna
Vol dar in nota la so' condizion.
Mi no so da chi 'l vaga, o a che 'l sia bon,
So ben che a par de do' fachini el magna,
E che no fè mai cesara in campagna
Tanta quanta lu a taola distruzion.
Chi diavolo è sta 'l pare, e chi la nena
De sta cossa, no so da dove ussia,
Che no se sa se l'abia panza o schena?
Mi credo che se mai la Bizaria
Dovesse un zorno comparir in scena
Che la saria el model de sta caia.
Che se mai per la via
L'incontra puti, i l'à per la Verola
Che i cazza spesso a viva forza a scola.
Se i sente la parola
I l'à per l'Orco afato, e sì no val
Darghe da intender che 'l sia un Carneval.
