LE DISGRAZIE DEI POETI
CAPITOLO
Canto de vu, Poeti povereti,
Vegno da ti, strazzosa Poesìa,
Rapezzà de Ganzon e de Soneti,
Che adesso, grama, no ti è più vestìa
Se qualche zaratan, qualche bufon
No te straveste de furfanterìa.
Ben è pazzia la to' riputazion!
Adesso ogni plebeo se fa Poeta,
Ma bon, più che da versi, da baston
Grama, magra, afamà, nua, povereta,
Mo qual è quel to' arlevo che podesse
Per to mezo imborsare una gazeta?
Co' se vede un per strada a magnar lesse
No se ghe dà sì presto su dei ochi,
Che i dise: Costù à forsi in le vraghesse.
Tuti, grami! i à balconi in su i zenochi,
E tuti à certe cape si pelae
Che le ze trabucheli da peochi.
