Un sorbeto sarà l'aqua de bogio.
Gavaremo severa
Tuta la primavera,
E ghe sarà el festin
De un vento da borin
Che ne rinfrescarà
Sin la scarsela,
E che ne obligarà
De star co la fanela
E in codegugno
Anca el mese de zugno.
Per mancanza assoluta de calori
La tera squasi spogia
Sarà de piante e fiori,
I albori la fogia
Butarà fora a stento,
Picolo insenetio
Se mostrarà el formento,
La campagna per tuto sarà indrio,
E malapena in magio spontarà
L'erba su qualche prà.
L'istà sarà pesante,
Afanoso, insistente e stravagante;
Darà suso ogni tanto scontraura,
Ogni tanto farà la garbinada,
E no sarà sicura
La zente a caminar per la so strada
Dai refoli de vento
