I me vien a sonar la campanela
Per saver se i à da tor suso l'ombrela.
E che arivà mi sia
Al non plus ultra de l'astronomia,
La prova d'ogni prova prevalente
Ze 'l numero imponente
De quei che ga el vantagio
De aver un per de rechie che fa agio,
La proprietà del gnoco,
L'istinto de l'aloco,
I quali quel che scrivo analizzando
Co un'invidia acanita
Come i cani da vita
I va sbragiando,
Ma poco favorii da la fortuna
I ghe sbragia sti stolidi a la luna.
Difati tante volte testimonio
S'à combinà che m'abia da trovar
Nel mumento che Tizio, che Sempronio
S'à messo a criticar
Senza pietà
Parola per parola
I lavori che ogn'ano go stampà
In velina coi tipi de Andreola,
E go, ve l'assicuro, go sentio
A dir l'ira de Dio,
Cosse ga mandà fora qualche boca
Che m'à fato vegnir el pelo d'oca.
