Pagina:Raccolta di poesie in dialetto veneziano 1845.djvu/133

Sta pagina la xe stà trascrita, ma la gà ancora da vegner rileta.
LAMENTO DELLE VENEZIANE


CONTRO LA PARTE DE' CORRETTORI ALLE POMPE.


Ste Done xe in orgasmo, in confusion,
     Le ga un pipìo grandissimo
     D'una reformazion
     Da la testa al fiancheto,
     5Dai pie sin al cignon.
Una stramba m'à dito:
     «Una Parte de pompe?
     Anca sta Parte qua ne seca e rompe?
     La barbarie d'un dì torna in Cità;
     10La go co' sti vechiazzi,
     Coi Catoni severi,
     Coi Fabi balonèri
     Che ne vorìa corète,
     Desmesse, convertie, anacorete.
15I ne voria ridur e far tornar
     In rede, co l'ovata, e forse in zocoli;
     I vorìa torne i cocoli,
     Sti Cavalieri bei tanto serventi
     Che per nu tira l'anema coi denti,
     20Po' i ne voria brusar i Santi Padri
     Elvezio, Montesquieu, Voltaire, Rousseau,
     L'Academie des Dames,
     E Ninon de Lenclos;
     I ne vorìa per fin
     25Fiscar anca el Casin,
     Quel sito, oh Dio, ridoto al Rocombol
     Dove se dise e fa quel che se pol!»
I finirà po' col volerne in casa,
     Anzi anzi in cusina
     30Co la lume da ogio
     A cuser canevazze,
     A taconar le veste e i gabanoni
     A sti novi Licurghi, a sti Soloni,
     E alora el sior Marìo,
     35Tornà alfin tiranèto,
     Obligarne vorà fin al lucheto.
     Oh Omo prepotente,
     Estu nato da nu
     Per nostra schiavitù?
     40Ah la Dona meschina
     La se fa el so Neron come Agripina!»
Cussì la m'à parlà sta temeraria,
     Ma quel ch'à da morir prima savaria.

RISPOSTA


AL LAMENTO DELLE VENEZIANE.


Done, no ve dè pena:
     No ve metè in spavento
     Se fusse anca per vu zonto el momento
     De meterve in caena,
     5O, a megio dir, de meter la cavezza
     A tanta tracotanza e sfrenatezza.
No ve ramarichè,
     El mal no sarà grande
     Come che vel pensè.
     10Se sa che dei Catoni,
     Dei Fabi, dei Licurghi e dei Soloni
     Xe passà el tempo, e che 'l mondo moderno
     Se ride de quei mati e se fa scherno.
     Ancuo se vol che ben vestii se vaga,
     15Sempre serae no se ve vol in casa,
     Molto manco in cusina
     A cuser canevazze,
     A taconar vestidi e gabanoni;
     Un pensar sarìa questo da minchioni.
20El mondo tuto ve vorà carète,
     No convertie, desmesse e anacorete,
     Come senza razon andè esclamando;
     No abiè timor de questo,
     A idee sì strambe dè un perpetuo bando,
     25Quel che da nu se vol xe ben tut'altro?
     Metève in atenzion, e ve protesto
     De dirve el con e 'l ron tuto desteso
     Aciò no possiè dir che no avè inteso.
Da vu altre se brama, che dai fianchi
     30Ve sia stacà i Serventi,
     Perchè semo po'stanchi
     De veder la Cità piena a martelo
     De marii cornisai, b... contenti;
     Se vol troncà el bordelo
     35Dei vostri Rendez-Vous,
     Nè che i se fassa più.
     Xe savio el mondo e nol vol più sofrir
     Che una galanteria sia el vituperio,
     E un vezzo de la moda l'adulterio,
40Cossa ve par, carine?
     Cosa me saveu dir?
     Qua lucheti no gh'è, no gh'è tirani,
     Nè se vol che stè in casa retirae

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=Pagina:Raccolta_di_poesie_in_dialetto_veneziano_1845.djvu/133&oldid=70064"