Certe finezze
Che tuti veda
No val un soldo
D'una in confronto
5Che nissun veda;
E quel ch'è sconto
Xe vero amor.
Una brisiola
Piutosto togo
10Che una cusina
De fumo e fogo,
Che no me sazio
De solo odor.
Mi son giusto de puina
Che ogni poco me rovina.
Ochi, cavei, colori,
Tuto me par tesori,
5E unite a mile a mile
Sento le tentazion.
M'incanta le bianche,
Me acende le more,
Son sempre l'istesso
10A tute le ore;
Pulite e pitoche
Per mi tuto è bon.
Xe ben che i omeni
No sapia tuto;
Più dolce è 'l fruto
D'un ignorante
5Credulo amor.
Chi tropo cerca
Tropo anca trova;
Chi no vol prova
Ga el privilegio
10D'un dolce eror.
Bele parole!
Co le xe sole,
Nina, tegnivele,
Manco che chiacolo
5Più gusto go.
Urtème, dème,
Paremo mati,
Ma che i sia fati;
Che co le chiacole
10No me fe zo.
Col vien, tolèlo
Come se 'l Cielo
Ve lo mandasse;
Che da là un poco
5Nol ghe xe più.
In un mumento
Se cambia el vento.
Favor de dona
Xe come l'onda
10Che ora va zoso
Ora va su.
Le vol aver un muso
Che se ghe mora suso,
Le vol che tuto sia
Belezza e legiadrìa.
E po... le man a casa,
E po... tegnirse in fren.
Chi pol senza esser mati
Acetar mai sti pati?
Diseghelo a dei legni
Che i toga de sti impegni,
Opur no andè cercando
Che se ve vogia ben.
El diavolo non è bruto
Mai tanto quanto el par,
A no se desparar
Un zorno nasce el caso
5Che no s'avea sperà.
Le done se compiase
Del credito de fiere,
Ma le vol anca el gusto
