Sior Schieson, un consulto. A un certo tal
Certi no so che bezzi mi ò da dar;
Son povaromo, i fati mii va mal;
Come posso mo far a no pagar?
Fèla a la gronda, amigo, prometè,
E a la promessa po no ghe atendè.
Co una tosa se vede dar 'na ochiada
Da qualche zerbinoto paregin,
Subito crede vegnir domandada,
E la camisa no ghe sta al martin:
Ma s'anca el sior schieson fusse una tosa
El crederìa anca lu l'istessa cosa.
Con un piè in te la fossa Crasitèo,
E con el viso tuto incresponà,
Fa ancora a più poder el cicisbèo,
Povero cuco, ti me fa pecà!
Amor (e questo è schiesonian aviso)
No gabia in cuor chi no lo ga in tel viso.
Se maravegia un tal, perchè a passar
Mai nol me vede per contrada bassa:
Ma no ti sa, minchion, che là ò da dar,
E dove s'à da dar mai no se passa?
Un debitor sta fiera pena el ga
De no poder zirar con libertà.
Va in cerca un tal de vender mercanzia,
Epur nol trova chi ghe daga un bezzo,
No aver pressa, minchion, de darla via,
Che ad esibirla se ghe tiol el prezzo:
Se fa come le done: la se nega,
Che alora po d'averla ognuno prega.
Quando la sorte no se ga contraria
El so anca mi che se par omenoni;
Ma quando, come a mi, la xe aversaria
Se vien giusto stimai tanti talponi.
Quanti ghe n'è che perchè i è poveromini
No i vien gnanca credesti galantomini!
Se 'l pare tuto 'l zorno alegramente
Tripudia a l'osteria, zoga, scialacqua,
E chiapa le so bale bravamente,
Cossa voleu ch 'l fio beva de l'acqua?
Per educar de sesto fioli e fiole
Bon esempio ghe vol e no parole.
Un sguerzo una matina s'à incontrà
In t'un gobo, e cussì el lo ga burlà:
Ti è ben cargo, a bon'ora sta matina!
El gobo ga risposto: pofardina,
Bisogna che a bon ora sia per certo
Perchè ti no ti gà che un scuro averto.
Una muger la se vantava un dì
Che i ghe disea minchion a so marì.
Un'altra gh'à risposto: Oh cara amiga,
Tasè che a farlo tal no gh'è fadiga.
La consorte d'un tal se sepeliva,
E so marìo cantava ch'el rapiva.
Gh'è sta dito ch'el tasa, che nol par
Bon in sto dì tanto alegro a cantar.
Oh bela, l'à risposto, se ai mii dì
Tanta alegrezza no ò mai provà mi?
Se fusse maridà, quando la mia
Morisse, mi per certo cantarìa.
