Un certo paesan gavea un caval
Longo e magro che parea un feral.
Un ghe domanda: a quanto al brazzo
Vendaressi sto vostro cavalazzo?
E lu, alzando la coda con disprezzo:
Entrè in botega che farò bon prezzo.
Un certo tal che un ochio sol gavea,
Ma che de furbarie ghe ne savea,
Con un ch'i aveva tuti do à scomesso,
Chi de loro ghe vede più da presso.
Per diana, dise el sguerzo, ò venzo mi;
E vustu veder se la xe cussì?
Mi do ten vedo con un ochio sol,
E ti con do vederme un sol ti pol.
Quando che la muger sussura in casa,
Aciò che la se quieta e che la tasa
El rimedio xe questo d'esperienza:
O corer via, o armarse de pazienza.
Chi à giudizio mai fissa un'opinion
Con chi no xe capace de rason.
Gh'è un debitor che se vol lamentar,
Che quaresema longa assae ghe par.
Ch'el paga a pasqua chi pagar el deve,
E la ghe pararà anca tropo breve.
Un avaro a una tal l'amor facea,
E con parole amare el la ponzea;
E po el se ne dolea sto bel umor,
Che no l'avea fortuna a far l'amor.
5Se fortuna in amor volè trovar
Ve bisogna una cossa, amigo, far;
La seradura che a la borsa avè
Su la boca convien che ve metè.
Amor vol splendidezza e cortesìa,
10E no vol avarizia e vilanìa.
Fermeve, viso d'oro,
Fermeve, bela puta,
Che ve contempla tuta
4Un pochetin;
Vedo che avè un sestin
E de la grazia tanta,
Grazia che proprio incanta
8E liga i cuori;
No xe da far stupori,
Come faria un sofista,
Se cussì a prima vista
12Me piasè;
Bisogna che sapiè,
E chi nol sa che quele
Cosse ch'è rare e bele,
16A tuti piase?
Benedete le case
Che ga de ste zogiète
De ste care cossete
20Come vu;
Più che ve vardo, e più
Ve scovro un trato degno,
Ch'al certo passa el segno
24E che no è in uso.
Oh caro quel bel muso,
Cari quei bei ochieti,
Che sieli benedeti
28Dove i varda!
Quela ganassa sguarda,
Quel fronte rilusente,
Quela boca ridente
32E singolar!
Me piase el vostro far,
Me piase el vostro sesto,
Un far ch'a del modesto
36E del furbeto.
Un cuor vu gavè in peto
Che a la fisonomia
Xe tuto cortesìa
40E senza orgoglio.
