Ti ga un cuor che no sente pietà
De chi tanto te stima e t'adora,
De chi tanto te xe inamorà,
Che no manca che 'l spira, ch'el mora.
Ma la morte per mi saria un miel
Se lassasse sto mondo per ti,
Perchè forsi in alora, crudel!
Ti traressi un sospiro per mi.
Quando m'insonio
De quela bela,
De quel'amabile
Ortolanela
Che vende bocoli,
Latughe e brocoli,
La trovo docile,
La trovo amiga,
Par che la spasema,
Che la me diga:
Per ti soleto
Mi sento afeto,
E tuta fervida,
Tuta tremante,
Che la me cocola
In quel istante
Co certa grazia
Che mai no sazia;
Ma quando Fosforo
Ne porta el zorno,
E che solecito
Ghe coro intorno,
L'ortolanela
No xe più quela.
No gh'e gnente de più amabile
De ti, cara mia Nineta,
Ti xe piena de grazieta,
Ti xe bela quanto un fior;
No gh'è gnente de più tenero,
Cara Nina, del to cuor.
Ti xe colta, ti xe savia,
Ti è impastada de talento,
No ti è dona, ti è un portento,
Ma de quei che fa stupor;
No gh'è gnente de più fervido,
Cara Nina, del to cuor.
Ti xe ti la bela gnognola
A Minerva tanto afeta,
Ti è la sola mia dileta,
Ti xe l'unico mio amor;
No gh'è gnente de più candido,
Cara Nina, del to cuor.
Un povero vilan,
Vedendo che un ricon del so paese
Andava ogni qual trato
Per consegi in mezzà d'un avocato,
El dise fra de lu:
Che i sia gnanca i consegi che fa richi?
Voi provar anca mi, vogio un consegio,
S'anca lu me costasse el bon e 'l megio.
El va donca a la presta
Co do grossi dindioni
Da un avocato, ma de quei de testa,
Che visti quei bestioni
Ghe dise al bon vechieto:
Cossa voleu da mi?
El contadin risponde: un consegieto.
Un consegio volè?
Sogiunge l'avocato, e ben.... parlè.
Ma, continua el vilan, vogio un consegio,
No so po dirve qualo,
Ma quel che a vu ve par....
Demelo, via, ch'e vostro sto regalo.
― Son qua, ve servo in bota,
Risponde l'avocato al bon marmota:
Chi à tempo vita mia no aspeta tempo.
E in sto mentre el ghe leva da le man
I do dindioni al povero vilan,
Che tanto lo ringrazia, e volta via
Tuto pien de contento e d'alegria;
