E arivà a casa, el varda el so formento
Che no gera ben fato in quel mumento,
Ma nonostante lu lo fa tagiar,
E i so fioli se taca a biastemar.
No i biastema per altro el zorno drio,
Che casca un tempeston, ne varda Dio!
Anzi i conferma tuti tre d’acordo.
Che chi trascura el tempo xe un balordo.
1Essendo un dì al passegio in compagnia
Un conte, un avocato e un zogelier,
El conte salta su: corpo de dia!
Son sempre al can co tuto el gran mio aver
L'avocato sogiunge: vita mia,
Semo compagni; e sì, mi go un mistier
Da tesorar; e dise el terzo ancora:
Più che guadagno più vago in malora.
2Cossa che sia sta roba po nol so:
Ma qua gh'è sconto certo qualche intrigo,
Più che laoro manco mi ghe n'ò,
Go manco bezzi più che me sfadigo;
Saveu mo, puti, cossa che farò?
Quelo che consegià m'à un bon amigo:
Me portarò doman da fra Vidal,
Che per consegi no se dà l'ugual.
3El conte e l'avocato salta su:
Amigo caro, no ne abandonar,
Permeti che vegnimo là anca nu
Per veder che 'l ne possa consolar.
Andemo in bota, el ghe risponde lu;
E tuti tre i se taca a caminar,
E in manco d'un'oreta i xe in quel sito
Dove ga el so tugurio l'eremito.
4I bate; e lu risponde: Chi va là?
Amici boni, i dise tuti tre:
Chi diamberne mai seu? per carità,
Sogiunge el frate, presto via, parlè;
In breve d'ogni cossa el xe informà,
E 'l ghe risponde come sentirè
In enigma, perchè cussì l'usava
Parlar co tuti quei che 'l consegiava.
5Pronunzia donca el bon servodedio:
Per vu sior zogelier ghe vol un legno;
E voltà à l'avocato: e a vu, ben mio,
Manco chiacole digo, e più contegno;
E vu, caro el mio sior conte sbasio,
Leveve su a bonora, e ve mantegno
Che se fe talequal sè fortunai,
V'ò dito tuto qnanto, adio spiantai.
6El conte, el zogelier e l'avocato,
Senza più bater beco i volta via,
Disendo tuti tre: mo che fratato!
Mo che tratar xe el soo, sangue de dia!
Che bela cossa mai gavemio fato
A far cussì a penini quatro mia?
Manco chiacole, legno, su a bonora...
Cossa vol dir sta roba in so malora?
7Ma l'avocato a forza de pensar
À capio ch'el remito xe un portento;
In renga lu no fava che sbragiar,
Saltando sempre fora d'argomento;
Per cossa mo? per no voler studiar;
Ma come el gera un omo de talento,
El s'à messo a la via, e in t'un sol mese
L'è deventà dei primi del paese.
8El conte prova alzarse una matina
Sul far del zorno, e averto el so balcon
El vede vegnir zo da la cusina
El cogo co un belissimo capon,
El camerier co un galo e una galina,
E 'l so lachè co un fiasco de vin bon;
El li sorprende, e 'l ciga sul mumento:
Intendo del bon frate l'argomento!
9Anca el nostro gramazzo zogelier
À capio che 'l remito xe un ometo.
Per disgrazia el gaveva una muger,
Che tuto el dì mandava roba in gheto;
Ma fa ancuo, fa doman un tal mistier,
Perdia! che se n'à acorto el bon cucheto;
E doparando a gradi un bravo legno
El l'à messa a la fin sul bon contegno.
10Saveu quanti ghe n'è de tale quali
Che xe pitochi e che no i sa perchè,
Che ga la testa simile ai cocali,
Che se fida de quanti che ghe xe?
Che tardi se ne acorze dei so mali,
E tardi i va cigando; oh dio! oimè!
Ma rimedio no gh'è per el so mal,
Perchè più no se trova un fra Vidal.
