Pagina:Raccolta di poesie in dialetto veneziano 1845.djvu/220

Sta pagina la xe stà trascrita, ma la gà ancora da vegner rileta.

     Fate a bissa, strete strete,
     I lo torna a cazzar su;
     155Ma ruscelo no l'è più.
L'è là statua in porcelana,
     Qua a man dreta l'è un putin
     Che ne l'ato de far nana
     Lassa andar el so pissin;
160L'è un Confucio in barba d'oro
     Che fa inchini e riverenze,
     E da questo e da quel foro
     Sbrufa liquide sentenze:
L'è 'l gran-Lama che co un scovolo
     165Sguazza i preti del Tibè:
     L'è un stafier co la so cogoma,
     Che ve spande adesso el tè.
Là a man zanca l'è un soldà
     Col so schiopo ben cargà,
     170Che za tira el bagagiol,
     E schizzeta luna e sol.
L'è un santon che versa lagreme
     Per ecesso de dolor
     Sul destin dei galantomeni,
     175Sul sepolcro de l'onor;
L'è un monarca che scialacqua,
     Che dà via per gnente l'acqua:
     L'è una dama che recama
     A perlete, a l'arabesca
     180Ponto in aria d'acqua fresca.
     Fato piova cristalina,
     Larga conca alabastrina
     Lo racoglie in t'un bersò;
     E 'l visir dal bel veder
     185Conta i zoghi per piacer.
Belo ('l dise)... e un trenta dò.
     St'onor donca no xe raro!
     Ma pur deve quel ruscelo
     Fin sto belo
     190Pagar caro;
     Quela vasca
     Soto el peto
     Dove el casca ga un buseto
     Co la storta
     195Che lo porta
     Zorno e note.
     In t'una bote
     Che lo svoda per la spina
     Su la scafa de cusina.
     200Cussì dopo d'esser stà

     A vangae desbatizà,
     Dopo aver ben recità
     Da gran Lama, da soldà,
     Da damina, da putin,
     205E da zane e buratin,
     Strupio, storto, snombolà,
     Cossa s'alo guadagnà?
     D'esser beco e bastonà,
     De lavar fin che ghe n'è
     210Piati e squele, e po el privè
     Del visir Kèkakalà.
De sta fiaba, che termina cussì,
     Florindo la moral l'à sgarugià.
     Tranquilo in vila l'à finìo i so dì;
     215Ma Lelio, più bizzaro o più ustinà,
     Xe andà a brilar in corte del Sofì,
     E l'è stà per equivoco impalà.
     Mi digo ch'el destin dei do zemeli
     Se l'à intesa co quelo dei rusceli.



LA FENICE.


Chi dise per vogia,
     Cussì, de viazar;
     Chi dise per boria
     De farse amirar.
     5La bela Fenice
     L'Arabia felice
     Scorendo in tre dì,
     De bel mezzodì,
     S'à un zorno trovà...
     10Sau dove-mo?... a Strà.
Baucando per aria,
     Soleta, a pian pian,
     L'andava su a Padoa.
     Savè, che a sta man,
     15Pisani-Moreta
     Ga un bosco. Stracheta,
     La dise: Sior si,
     Fermiamoci qui!
     E un carpano ochià
     20La se ga sentà.
La fama, petegola
     Per genio e mistier,
     L'à fato ai volatili
     In bota saver.

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=Pagina:Raccolta_di_poesie_in_dialetto_veneziano_1845.djvu/220&oldid=70115"