Co no vedo mi no credo,
E co vedo vardo e taso,
140Ghe xe forsi cascà un baso,
E l'invidia tagia zo.
Tut'a un trato Momoleta
De un spernachio sul confin
Spuntar vede una steleta
145Col so lampo cristalin:
«Oh co bela! oh dio co bela!
Varda, Osmano, che splendor!
Quela stela, quela stela...
Ah! ghe lasso suso el cuor. —
150— Vita mia, risponde Osmano,
Per pietà no ghe pensar...
Che tormento! oh dio! che afano
No podertela donar.»
Done care, done bele,
155Cossa mai voleu de più?
Ah gavè tra carne e pele
Qualche magica virtù!
Ma per altro po, sorele,
Cussì a dirsela tra nu,
160O fe 'l manego a le stele,
O lassele star la su.
Un aseno portava su la schena
Le reliquie d'un santo in prussission.
Che popolo! La piazza gera piena...
Zo riverenze: tuti in zenochion.
5L'aseno, che toleva quela scena
Per una personal venerazion,
Marchiava in gravità, vardava apena,
E se credeva almanco Salamon.
L'istesso a mi sta note: m'ò insognà
10De meter su la vesta. Ih! ih! che fola!
Che inchini a rompicolo qua e de là!
Oe! scomenzava a far la sotogola...
M'è cascà i brazzi co m'ò ricordà
Le mie maneghe larghe, e la mia stola.
15Regazzi! corè a scuola
De virtù e de saver. Sapienti, onesti,
Se no ancuo (che no i par tempi questi)
Vegnarà un dì, che senza
Ordini, toga, titoli, divisa
20Godarè la beata compiacenza
De farve rispetar anca in camisa.
El marchese Merliton
Rico, vano e macaron,
(Qualità gentili e bele
Che sol viver da sorele)
5Se credeva, poverazzo,
D'aver tute in testa a mazzo,
Seben sparse in tante parti
Le dotrine e le bel'arti,
E vedeva in tei so bezzi
10Scienza, brio, talenti e vezzi.
Ogni zorno una dozzena
De bei spiriti de schena,
De sublimi progetisti,
De antiquari, de modisti,
15De mercanti d'antrezzà,
De gargati in elafà,
De maestri de penelo,
De dotori de scarpelo,
De alchimisti, de architeti,
20De oratori, de poeti,
Tuti amici de la gola
Decorava la so tola.
Chi mostrava un disegneto,
Chi diseva su un soneto,
25Chi stonava un bel rondò,
Chi strussiava do bomò
Chi abozzava una chiacona,
Chi l'arena de Verona;
Questo imagina un negozio,
30Quelo giusta l'equinozio,
Uno dona, st'altro tol,
E fa un terzo i conti al sol.
El marchese gravemente
Sente tuto come gnente,
35Tuto esamina e corege,
E stranua sentenze e lego.
Muti, estatici tra lori
