Pagina:Raccolta di poesie in dialetto veneziano 1845.djvu/291

Sta pagina la xe stà trascrita, ma la gà ancora da vegner rileta.

     Mi pianzeva, e lu rideva,
     20E 'l diseva: «ti xe bravo,
     Ma, birbon, t'ò fato schiavo.»
     La gran rabia che go bu!
     Saveu come che l'à fato
     A chiaparme sto bricon?
     25El s'à messo come un gato
     Quachio quachio a cufolon;
     L'à spetà che un dì Nineta
     Me contasse una fiabeta;
     Mi, credendo esser in porto,
     30De colù no m'avea acorto;
     E lù, vien per da drio via,
     Chiapa, strenzi, e mena via,
     Nè val pianti, nè rason.
     A scravazzi de sta sorte
     35Sto baron ghe ne sa far,
     Come un bogia el dà la morte,
     Quanto un bogia el sa strozzar;
     Lu ga lazzi, el ga manere,
     El ga forni, el ga caldiere,
     40El ga corde e manganeli,
     El ga chiodi, el ga marteli,
     E lanzete e gamauti...
     Ah! scampeghe, cari puti;
     No se vince che a scampar.


LA LONTANANZA.


Come el vilan l'istà,
     Ch'el calor ga arsirà
     3L'erba e le biave,
Brama l'acqua dal ciel,
     Che più dolce del miel
     6Per lu sarave;
Come che un pelegrin
     Brama vederse al fin
     9D'un longo viazo;
E che un interessà
     El tesoro trovà
     12Lo brama al sazo;
E come chi xe in mar
     Dopo un gran navegar
     15Sospira el porto:

E come brama san
     La mare el fio lontan,
     18Solo conforto:
Come el sol el Lapon,
     La libertà el preson,
     21L'orbo la luse;
Con un istesso ardor
     A bramar quel to cuor
     24Amor m'induse
Con un istesso? no
     De più bramar lo so,
     27Più lo sospiro.
Quei altri a delirar
     No i vedo e angonizzar
     30Senza respiro:
Mi sì, che sento in sen
     E le fiame e 'l velen,
     33Nè go un conforto.
Quel che savaria in mar
     No vorave trovar
     36La morte in porto;
Nè 'l pelegrin vorà,
     Dopo aver ben strussià,
     39Patria e caena;
Nè veder l'orbo el ciel
     Per no bever che fiel
     42Disnar e cena.
Mi, del to cuor paron,
     Aceto la preson,
     45Morte disprezzo.
Credilo, cara, si,
     Ogni ben l'è per mi
     48Ben senza prezzo.
Ma come che l'amar
     Ne fa spesso cascar
     51In tel delirio!
Sospiro per amor,
     Desidero el to cuor,
     54Perchè sospirio?
No me l'astu donà,
     E no m'astu zurà
     57Mai torlo in drio?
E vero, si, mio ben,
     Ma ti è lontana, e in sen
     60Ti 'l ga col mio.

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=Pagina:Raccolta_di_poesie_in_dialetto_veneziano_1845.djvu/291&oldid=59698"