De unirse e infradelarse,
Guai chi disesse mai de concentrarse!
La galina vedeva
25Tute le operazion che se faceva,
E gh'è qualcun che dise,
Che la se la rideva.
Ma finalmente un zorno
Che i sussurava tuto quel contorno,
30La l'à chiamai davanti
Uniti tuti quanti,
E l'à dito: «Putei,
Pulesini fradei,
Cossa ve salta in testa?
35No gavè ale, nè cresta,
No gavè fato el beco,
Sè magri come un steco,
E parlè come gali,
E ve scordè
40Che da mi dipendè,
Che mi v'ò fato nascer per ogeti
Degni de mi e perfeti?
Ah cari i mii putei,
Pulesini fradei,
45Quieteve cari, e magnè papa adesso!
Quando che dal destin sarà permesso
Ve darò stato, fioli, e lo farò
Come che credarò.»
Vien dito che nissun disesse: oibò.
50Se fra i bipedi umani
Dei paesi italiani
A isolarse qualcun pensa o destina,
Che 'l se ricorda sempre sta galina.
In quei bei tempi d'oro,
Che parlava el molton, la manza, el toro,
Le mosche, i rospi, i sorzi, i aseneli
E che tuti parevimo fradeli,
5Che nasceva i puteli
Senza che la comare o 'l comaron
Facesse dele brute operazion,
Che gera tuto bon;
Che dai roveri el miel,
10Dai fiumi se gavea late e puina,
Che no gh'era cusina,
Nè leti, nè poltrone,
E che le done gera nine e none,
Val a dir brave e bone,
15Servindo d'una gran comodità
A tuta quanta la comunità
Senza driti esclusivi;
Che sicuri dormivi,
Che no ghe gera lite e terza e nona,
20Nè dei grandi la razza sfondradona,
(Tempi che se i xe stai,
No i tornarà più mai
Per i nostri pecai)
Giusto in sti tempi digo, gh'è sta un omo,
25Che stufo de campar da galantomo
Una dona l'aveva inzinganà,
El s'avea messo in testa
De formar quel che i chiama società,
Co lu l'avea chiamà
30Un bravo gato e un can,
Za persuasi de sto novo pian.
I è andai in t'una valeta
Da la madre natura predileta,
E in quela i à destinà
35De piantar sta so nova società,
L'omo cussì à parlà:
«Animali fradeli,
Se ò da considerarve come fioli
De quela che chiamemo la natura,
40Che à stampà ogni creatura,
De mi inferiori assae,
Per altro co se vol considerar,
Che in do pie no podendo caminar,
No gavarè mai man,
45Come el genere uman;
Quando se pensi a la mia gran malizia,
Che da qua avanti chiamarò giustizia,
Filosofia, rason,
E che un zorno à da farme parer bon;
50Animali, diseva,
Vu vedarè che no savemo unito
Per scampar dala sè, o dal'apetito,
A bastanza ne dà
Quela che n'à creà,
55Ma i gusti è pochi e scarsi,
E v'ò fato capir,
Che stando uniti insieme
