Che i li fazza via de qua
Ma da mi no ghen sarà.
Mi no magno altro che osei,
Ma i xe quei,
Co i ghe piase.... Cossa ài dito?
Co i ghe piase? Che dimande!...
Eco qua che i porta in tola;
Le se comodi, signori,
Le se senta tuti quanti,
Via, comare, feve avanti,
Là vicina al sior Zaneto.
Ela po, siora Mariana,
Me la vogio sempre arente....
Oh la toga.... gnente, gnente,
No ghe bado, la li magna:
La li magna che i xe boni;
I xe quarti de frisoni,
Ben conzadi,
Cusinadi
In paela
Co garofolo e canela,
E co questi i ga conzà
Un bocon de pan tagià.
Questa xe la mia menestra;
No gh'è risi, no gh'è bisi,
No gh'è vena, no gh'è lente,
No gh'è sope, nè polente,
Nè 'l panizzo, nè l'erbete,
Nè rafioi, nè lasagnete,
Cao-de-fiori, macaroni,
Cussì boni.
Traria zo per le finestre
Ste menestre
Negre, rosse, latesine,
Zale, verdi, e che soi mi?
Che a le tole più stimade
Vien portade,
Vien magnade
Senza gnanca dimandar
Cossa diavolo le sia;
E chi sa, che porcaria,
Che potachi che le xe!
Se savessi quante volte,
Che go visto certi coghi
A burlar i so paroni
Dei boconi che i à magnà...
Qua da mi no l'è cussì,
Magnè pur con libertà....
Oh i xe qua co la fritura....
Ma le senta mo un pocheto
Che gran testa che go mi:
No go miga testa dura,
Mi me piase ben magnar;
Za le lo crede,
E po le vede,
Me son quasi destrigà
Tuta quela arcimanestra,
Che qua a tola i ga portà.
Onde tornando a bomba
(Dirave i fiorentini)
Mi che voria magnar ogni momento
Me son pensà de tor medicamento.
Ma la xe una medicina
Che xe mia particolar,
Che la serve a maravegia
Per farme vegnir vogia de magnar.
Se le andasse per Venezia
Ne la megio spiziaria
No le trova medicina
Più operosa de la mia....
Vedeu là quela fritura?
Queli xe tuti montani,
Oseleti freschi e sani,
Che ga un certo saporeto
Amareto,
Che li fa medicinali,
E mi i me fa guarir da tuti i mali.
Ma ghe vol po la so dosa,
Convien torli in quel tal modo,
E secondo i vari mali
I va coti in butiro, opur in brodo.
Per el mal d'inapetenza
I va coti in sta maniera,
Ma perchè po i fazza efeto
No saria gnente una dozena intiera,
Ghe ne vol almanco do:
Sì: vintiquatro osei,
Co no i xe più che bei,
Ogni poca de panza
Che gabia quelo che li vol magnar,
Per medicina i stentarà a operar.
Mi lo provo
Co me trovo
Co una panza cussì piena,
Che dal peso per portarla
La me fa doler la schena.
