E chi trovio là drento?
Amor vicin al fogo
In falda, scalmanà, che 'l fava 'l cogo.
15In vece de registri
Ghe gera cazzarole col viglieto
Del logo dove 'l piato era direto:
In vece de ministri
Moltissimi corieri,
20Vestii da camarieri,
Stava 'l piato a aspetar,
Che per el mondo se dovea portar,
E conforme che 'l gera, o rosto o lesso,
Se tirava 'l preludio, o in ben o in mal,
25Sul futuro sucesso
De quela tal union matrimonial.
Per esempio un pastizzo
Ai mii tempi per mi sarà stà fato;
E per qualche altro mato
30Una bona salseta,
Che almanco da novizzo
Gabia fato parer la goba dreta.
Ma mi me interessava
De saver le piatanze che se usava,
35E che più i consumava;
E za ghe gera in vista
A l'uso dei tratori la so lista.
Se vedeva disposti
Gran pastizzi, e gran rosti,
40Gran piatanze co l'agio, e gran limoni,
Alquanti macaroni,
Gelatine, gran salse colorate,
Dei fruti, pochi dolci, e gran salate.
«Cossa mai, digo alora,
45Ghe sarà parechià per sto imeneo?»
Vardo, esamino, cerco, e salta fora
Un bel piato de cuor coto sul speo.
Mi 'l preludio ò capio,
E da de là partio
50Vel vegno, o sposi, subito a schiarir:
«Co 'l cuor xe rosto no gh'è da che dir.»
SANDI - MENGOTI
Promemoria ai Sposi.
Ochio, sfesa e subioto, i xe tre modi,
Che ga in uso fra nu l'agricoltor
Co 'l zonta insieme de do piante i nodi
Per darghe ai fruti qualità e saor:
Nè a l'orba no, ma coi principi sodi
Del so mistier, poloni de vigor
El va cernindo; el va scartando i vodi;
L'unisce quei, che à simpatia de umor.
Ancuo in ste nozze xe previsto tuto;
Vu, sposo, avè trovà la vera pola,
Che darà co l'incalmo otimo fruto:
Altro no resta, che la scielta sola
Del modo de incalmar co più costruto:
Vu se l'agricoltor... savè la scuola.
DEL SIGNOR
FRANCESCO BERTAGNO
Tre xe i stati dei omeni a sto mondo,
Celibi, sacerdoti e maridai;
Par el più belo el matrimonio, e in fondo
L'è giusto quel, che ga magiori guai.
Celibato el credè forsi el secondo,
Perchè con lu no ve trovè ligai:
Ma se un tantin nel navegar sè tondo
Libertà va a Patrasso, e sè negai.
El sacerdozio sì, che 'l xe 'l più san:
Lu ve procura el dolce dei do stati
Senza missiarghe drento anca el malan;
Sposa che no ve fa deventar mati,
Che invece de magnar la ve dà 'l pan,
Fioi che no pesa, e paga apena nati.
