Fiori, nastri e merli fini;
A sta ora basta un velo
Che te sconda apena el belo.
Tuto tase,
E per le case
Da la note semenai
Cala i sogni, e indormenzai
I marii de data vechia
I xe duri assae de rechia.
Ma per quei
Che xe novei
I papaveri no cala,
Impazienti el cuor ghe bala,
E sensibili ai mii doni
I spalanca un per de ochioni.
Coragiosa,
Bela sposa,
Cori in brazzo a chi te adora,
La mia fiacola tra un'ora
Scaldarà pronuba i feri
Nei dolcissimi misteri.
Per un nodo
Tanto sodo
Chiaparà, te lo prometo,
La to patria più conceto,
E ignorar che gh'è Bertiolo
Sarà un segno de pandolo.
Che bei fruti!
Che bei puti!
Nassa el primo senza boria,
Companizzite la gloria,
Che impegnar no te voi tanto
De l'amor nel primo vanto.
Ma fecondo
Del secondo
Co sarà, sposa, el to grembo,
No del Tasso, no del Bembo,
Ma de un cigno più vicin
Cerca in casa l'oro fin.
Vastu a segno
Col to inzegno?
Vogio dir da Giacometo 189
De le muse predileto,
E de Pindaro fradelo,
Cerca un pezzo da cartelo.
Solo un pezzo?....
Che sempiezzo!
Roba tuto el scartafazzo
Dove gh'e belezze a sguazzo,
E tamisa zorno e note
Le pindariche so bote:
Ispirà
Da to cugnà
El bambin cuss'sarà,
Che secondo nassarà,
E co i altri dise oà
Qualche verso el te farà.
A le porte
No pol morte
Bater più se gh'è un aloro:
El poeta xe un tesoro
Che pol dir, bezzi no go,
Ma crepar? oh questo no.
Providenza, Providenza! 190
Gh'estu in fato, ò xestu un zero?
El negarte xe insolenza,
L'acordarte xe un mistero.
De ti parla el pra vestio
In april de bei colori,
L'oseleto che fa 'l nio,
El zardin che buta fiori.
L'ava inquieta e facendiera,
Che dal bozzolo se mola,
Co a l'odor de primavera
Tuto el mondo se consola.
De ti parla l'alboreto
Che da nuo che 'l gera prima
Ubidiente al to decreto
Se fa verde in banda e in cima,
