DI
GIAMBATISTA BADA.
Nè picolo, nè grando, ma scarmeto,
Fronte averto, ochi mori e barba folta,
Bela coa de cavei, siben incolta,
4Longa oto quarte, e de color bruneto;
Che in venezian sa far qualche soneto,
Ma de quei da dozzena e da racolta;
Che à composto el Baracola una volta,
8E tre o quatro poemi in sto dialeto;
D'umor alegro, amante del chiassar,
Colerico a le volte, ma co gnente
11Facile da poderse mo voltar;
Pien de sincerità, che stoicamente
De viver po ghe piase e de tratar,
14Sora tute le cosse indiferente.
Del soneto presente
Questo, siori, è l'autor. Deghe un'ochiada,
17Che l'è deposta Zambatista Bada.
Za che, per bontà vostra, son costreto
De doverve lassar, anima mia,
Permeteme un adio co sto soneto
4Che l' ultimo vorè forsi che 'l sia.
Sapiè peraltro che tranquilo e lieto,
Cara, dal vostro fianco vago via;
Che se ò da dir el vero mi in efeto
8Gera stufo de starve in compagnia.
Nè ve aspetessi mai, che con impianti
Ve vegnisse a zurar d'aver gran pena
11Nel doverve lassar, come fa tanti;
Perche amor m'à ligà d'una caena
De quele che in tragedia i comedianti
14Adopara de lata in su la scena.
