Se 'l povero Fetonte fusse stà
Capace come vu nel parar via;
I sturioni de Po no gavaria
4L'ingorda fame a spale soe sazià.
Mi mo, che vanto sempre verità,
E che adular nissun mai podaria,
Sentì per mia opinion quel che diria
8Su la vostra famosa abilità.
Diria donca, che credo fermamente
Che quelo de Fetonte, no sicuro,
11Ma sucedeva un altro inconveniente;
Che a forza de scuriar e tegnir duro,
Come ve vedo far presentemente,
14Ne fevi star quatr'ore prima a scuro.
Sogno curioso, ti xe tanto belo
Che te voi far saver a tuto el mondo!
No gh'è poeta, no ghe xe penelo
4Che scriva, o che depenza, el to segondo!
Quel che ne passa el dì per el cervelo
De ben, de mal, de tristo e de giocondo
Se lo sognemo che nol par più quelo,
8Ma co'l se cerca el se ghe trova in fondo.
Sentìme, e capirè dal sogno mio
Gera Vicenzo avanti, e mi da drio;
11Se so andà arente al vero, o se lontan.
Coro, lo avanzo, e po dopo pian pian
Lo chiapo per el muso; el ciga, oh dio!
14Me desmissio, e me trovo el culo in man.
