Le celeghe se becola,
El nio fa el lugarin:
Chi xelo, che li stuzzega?
4Amor... lo sa un bambin.
Amor fa in toni flebili
Languir el russignol;
E per amor la lodola
8S'alza, cantando, al sol.
Che amor mo? Amor volubile,
Amor che vien, che va.
Che scherza, che zogatola,
12Che passa co l'istà.
Ma quel'amor che vincola
A do sposeti el cuor,
L'è amor, che no ga limiti,
16El xe costante amor;
El xe un amor mirabile,
Ohe amar la zoventù
Fa per i doni intrinsechi
20De nobile virtù;
El xe un amor de spirito,
Che, co l'intiva in boa,
Bisega fin ne l'anima,
24Tien cheta la rason;
Un savio amor, che stabile
Vol pase mantegnir,
Che a tempo avisa, tolera,
28Corege, sa blandir;
L'è quel'amor, che zovene,
Che fresco, ben piantà,
Col tempo se fortifica,
32Ridendo de l'età.
Va là, canzon, presentite
Ai sposi, e dighe: che
Amor el più premiabile
36Al mondo no ghe xe.
Brunota, ben tarchiada, colorida,
Co do ochi brilanti, ma tranquili,
De passo franco, portamento grando,
Aspeto vigoroso; ativa sempre,
5Serena in fronte, e el bel bochin ridente...
Vardila, Neno, questa è la salute.
Vardila, e tiente arente. La xe questa.
Che 'l piacer conza, slegierisce i pesi,
Fa belo el mondo. Co una ochiada sola
10La raviva, la svegia, la sicura,
Voltela via?... languori, afani, dogie,
Spasemi, convulsion, la morte istessa...
Ti, Neno, ti lo sa quanti xe i mali,
Che xe pronti a assaltarne se la scampa.
15Ringrazia el ciel; la t'è tornada in brazzo,
Ogni mal xe svanio. Famegia, amici
Tuti esulta al to ben. Godila, e vivi.
Godi de sto tesoro,
E sapilo aprezzar:
20Le tere, i onori, l'oro,
Lo porli compensar?
L'è un don de paradiso,
Che a gratis ne vien dà,
Senza vardar in viso
25A chi più in alto sta.
Vedistu quel palazzo?
Trovime ti l'egual:
Là ghe richezze a sguazzo;
Ma ghe anca a sguazzo el mal;
30E mentre là, fra el susto,
Geme amalà el signor;
Povero, ma robusto,
Va per el prà 'l pastor.
Do xe le zogie pure
35Concesse in lera al bon,
Per rider de le cure.
E sofegar passion:
Salute, e pase; questa
Fa l'altra assaporar.
40Che tute do te resta
In vita a consolar!
