Cossa v'à fato, o done veneziane,
Quel vostro bianco povero faziol,
Che in testa nicolote, e castelane,
4Ve metevi in leon co gera el sol?
E perchè invece ancuo porta le lane
Le muger e le fie del barcariol,
Come le dame, come le sultane,
8Che va in pompa cussì perchè le pol?
Spiegheme sta rason de cambiamento,
O de Venezia mia bele donete,
11Che muar ve fa stato e portamento.
Credeu che i possa dirve muneghete
Col bavareto in testa, o che spavento
14Le done possa far modeste e nete?
Sì, donete, meteve el capelin
Picolo, o grando come vol la moda,
Adateve i polseti, el ventolin
4Manizè pur, ma con grazieta soda.
Longo o curto abiè pur el tabarin,
Compiaseve se l'abito i ve loda,
Co bela scarpolina el bel penin
8Lassè che in balo onesto se la goda;
Che s'à usà sempre, e sempre se usarà
Che le done inclinae sia a deliziar
11L'omo che al vostro sesso xe inclinà.
Ma tuto quel che no convien mostrar
No mostrè a tuti, perchè tuti sa,
14Che co se espone incanto se vol far.
De zoventù go qualche indizio ancora
Nel caminar, ne l'esser svelto e franco,
Spesso in parlar senza pensarghe sora,
4Nel no poder de rider far de manco;
Tuto el resto xe andà squasi in malora,
Nè se me vede più de done a fianco,
Nè de la note co xe tarda l'ora
8Fra i amici nissun me cata in branco.
Dunque son là cussì come in balanza,
Siben canuo casco in sempiezzi, e casco
11Perchè vincer no so la mala usanza.
Oh! va adasieto, no far tanto el vasco,
Sii prudente, e se mai morbin te avanza,
14Ridi del vechio destinà a far fiasco.
Ghe xe qualche persona che me acusa
De scriver tropo spesso in poesia,
De far tropo bordelo de la musa
4Tropo scialaquo de la fantasia.
Xe vero, in tuto chi assae usa abusa,
Ma se no so far altro, se la mia
Fortuna ogni risorsa me ricusa
8Goi da morir da la malinconia?
Mi scrivo per mi solo, e per mi spendo
Quela monea che go, nè go pretesa
11De lezer, de stampar quel che no vendo.
Xe questa la mia unica difesa,
Se i altri no la intende, mi la intendo,
14Vivo del mio, xe tuta mia la spesa.
