Pagina:Raccolta di poesie in dialetto veneziano 1845.djvu/463

Sta pagina la xe stà trascrita, ma la gà ancora da vegner rileta.
XI.


Studiè l'istoria de la vostra zente,
     De quel paese che v'à dà la cuna,
     Che v'à tegnuo arlevà paternamente,
     4Che v'à dà pan, e stabilio in fortuna.

Piutosto che imparar cosse da gnente,
     O assae per no saverghene nissuna,
     Finindola per viver miscredente,
     8O più che Dio per venerar la luna.

Quel citadin, che de la patria tera
     L'istoria no conosce, xe quel fio,
     11Che sconta ga l'origine soa vera;

Che infin xe mulo, e no pol dir xe mio
     Quel nome che i m'à messo, o xe una sfera
     14De un relogio che core, o che stà indrio.


XII.


Queli che ghe vol ben al mio paese
     Li considero come mii fradei,
     E no podendo ch'esserghe cortese
     4Li trato in confidenza, e senza el Lei.

Li voria veder trenta volte al mese,
     E come un pare ch'ama i so putei
     Li stimo se i xe zoveni, e le spese
     8Ghe faria del mio pan de semolei.

Se po i xe vechi co tuto el rispeto
     Voria servirli, e procurar voria
     11Che i gavesse ogni sorte de dileto,

Ma se nemici de la patria mia
     Voria spogiarli, torghe el pan, el leto,
     14E vorave mandarli in picardia.


XIII.


La nostra gondoleta veneziana
     Dei bambini de Venere xe cuna,
     Xe 'l coo dove le grazie va a far nana,
     4De tuti xe la cocoleta bruna.

Con nu la incontra ogni vicenda umana
     Sul canalazzo, in rio, su la laguna,
     La xe con nu dolente, e mata, e vana,
     8Al sol, al fresco, al ragio de la luna.

Del citadin amiga, e del foresto,
     Ela mantien del barcariol la razza,
     11La xe del solazier scherzeto onesto.

La xe lanza a un guerier senza corazza,
     La ispira el canto, e xe Torquato el testo,
     14Co l'acqua alta ela scorsizza in piazza.


XIV.


La compassion de le miserie umane
     Xe come la stagion de primavera,
     Che coi fiori, e l'umor de le fontane,
     4Consola, e dona el gaudio su la tera.

La povertà che sperimenta vane
     Spesso le umiliazion de la preghiera,
     Che da ela se vede andar lontane
     8Le persone de rica e de alta sfera;

Oh! quanto, oh! come, se gode e conforta
     Co la pietà ghe fa un soriso, e sente
     11Qualcheduno che bate a la so porta!

E co la trova in mezzo a tanta zente
     Un'anima cristiana che ghe porta
     14La carità che ga negà el potente.

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=Pagina:Raccolta_di_poesie_in_dialetto_veneziano_1845.djvu/463&oldid=59278"