Ga Superbia un caval solo,
Dalla fame un xe crepà,
Senza bezzi torlo a nolo,
L'ha de bando procurà.
Un stocchetto mal condotto
In sto zorno de morbin,
Per disgrazia fantariotto,
Ha volesto un milordin;
Per dolor, per el dispetto,
Xe la Dama in convulsion;
Gh'è pesante sto casetto,
Più che in altra, in sta stagion.
Sior Vettor fisonomista,
Soldi impresta in quantità,
Lu conosce a prima vista,
Chi xe senza, e chi ghe n'ha.
E l'ombrelle, e i gabanetti
Da lu corre a procession....
Che ripieghi benedetti,
Nel serrar della stagion!
