PER LA GRAZIA AVUDA DA CUPIDO.
SONETTO
Hò tanto pregà Amor, che 'l me soleva
De scriver in materie tonde, e grasse,
De parlar de puttane, e de bardasse,
4Che 'l m'hà fatto la grazia, che voleva.
No sento più quel peso, che gaveva,
Che me tegniva oppresso in cose basse,
E se i oggetti no xe de prima classe
8El mio spirito adesso no se leva.
Come mai hoggio fatto sto gran salto,
Che me par con i dei toccar el Cielo!
11Forza d'Amor, che m'hà levà sì in alto;
El m'hà scoverto un Mondo assae più belo;
A tal comparsa, a cussì bell'assalto,
14Me son messo a svolar, come un Oselo.
